Գյումրին և Մոն-դը-Մարսանը դարձան քույր քաղաքներ. Մոն-դը-Մարսանում բացվեց հայկական խաչքար-ցայտաղբյուր

02 ապրիլի, 2022

Ապրիլի 2-ին Մոն-դը-Մարսանում անցկացվող «Երազ» խորագրով Հայաստանին նվիրված երկշաբաթյա փառատոնի եզրափակիչ միջոցառումների շրջանակում Ֆանսիայում Հայաստանի դեսպան Հասմիկ Տոլմաջյանը մասնակցեց Գյումրի և Մոն-դը-Մարսան քաղաքների միջև բարեկամության և համագործակցության հռչակագրի ստորագրման պաշտոնական արարողությանը, որով պատմական ու մշակութային հարուստ ավանդույթներ ունեցող Գյումրին և Մոն-դը-Մարսանը հռչակվեցին քույր քաղաքներ:

Հաջորդիվ Մոն-դը-Մարսանի կենտրոնական զբոսայգում քաղաքապետ Շառլ Դայոյի, Գյումրիի առաջին փոխքաղաքապետ Արթուր Պապիկյանի, Հայաստանի դեսպան Հասմիկ Տոլմաջյանի, Մոն-դը-Մարսանի Գասկոն թատրոնի տնօրեն, «Երազ» փառատոնի նախագահ Անտուան Գարիելի մասնակցությամբ, ինչպես նաև Մոն-դը-Մարսանի և Գյումրիի քաղաքային խորհուրդների անդամների, տեղի բնակիչների և բազմաթիվ հյուրերի ներկայությամբ տեղի ունեցավ Գյումրի քաղաքի կողմից Մոն-դը-Մարսանին նվիրված հայկական խաչքար-ցայտաղբյուրի բացման արարողությունը։

Իր ելույթում դեսպան Տոլմաջյանը շնորհակալություն հայտնեց քաղաքապետ Դայոյին և Գասկոն թատրոնի տնօրեն Անտուան Գարիելին՝ «Երազ» փառատոնի նախաձեռնության ու փայլուն իրագործման, ինչպես նաև Գյումրի ու Մոն-դը-Մարսան քաղաքների միջև համագործակցության մեկնարկի համար։ Դեսպանը կարևորեց նաև հայկական ինքնությունն ամենավառ կերպով արտացոլող խաչքարի բացման արարողությունն ավանդական հայկական ներկայություն չունեցող, սակայն վերջին երկու շաբաթներին Ֆրանսիայում հայկական մշակութային կենտրոնի վերածված Մոն-դը-Մարսանում: Ավարտելով խոսքը` դեսպանն արդյունավետ համագործակցություն մաղթեց Գյումրի և Մոն-դը-Մարսան քաղաքներին, ինչպես նաև նորանոր թողարկումներ մեծ հաջողությամբ պսակված «Երազ» փառատոնին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր